ककनी — जेठ ७, २०८२
शिक्षा र सेवाको संगमका रूपमा चिनिँदै गएको ककनी गाउँपालिकामा फेरि एकपटक सामाजिक उत्तरदायित्वको सशक्त उदाहरण प्रस्तुत गरिएको छ। “सेवा र विकासका लागि युवा” नामक सामाजिक संस्थाको समन्वयमा, ककनी गाउँपालिका वडा नं ५ का पाँच वटा विद्यालयका विद्यार्थीहरूलाई शैक्षिक र खेलकुद सामग्री वितरण गरिएको हो।
यो कार्यक्रम ककनी–६ निवासी समाजसेवी दावा लामाको व्यक्तिगत पहल र प्रेरणाबाट सम्भव भएको हो। लामो समयदेखि विभिन्न सामाजिक अभियानमा सक्रिय रहँदै आएका लामाले यसपटक शिक्षा र बालबालिकाको भलाइका लागि आफ्नो सक्रियता प्रस्तुत गरेका छन्। स्थानीयस्तरमै नेतृत्वदायी भूमिका निर्वाह गर्दै आएका लामा शिक्षा क्षेत्रमा निजी स्रोत र संस्थागत सहयोग समेटेर योगदान पुर्याउने विरल व्यक्तित्वका रूपमा चिनिन्छन्।
कार्यक्रम काउलेदेवी ककनी ब्राइटर माविको आयोजनामा सम्पन्न भयो, जसअन्तर्गत वडा नं ५ मा रहेका पाँचै विद्यालयका विद्यार्थीहरूलाई विद्यालय झोला, स्टेशनरी तथा आवश्यक शैक्षिक सामग्रीहरू प्रदान गरियो। साथै, प्रत्येक विद्यालयलाई २/२ थान फुटबल, २/२ थान भलिबल, १/१ थान नेट, र १/१ थान ब्याड्मिन्टन सेट वितरण गरिएको वडा अध्यक्ष बुद्धराज लामाले जानकारी दिनुभयो।
शिक्षासँगै महिला सशक्तीकरणमा पनि विशेष ध्यान दिइएको यस अभियानमा, वडा नं ५ मा क्रियाशील महिला समूह र महिला अभिभावकहरूलाई ३०० थान झोला प्रदान गरिएको हो। कार्यक्रम नेपाल–भारत सहयोग, प्राज्ञिक विद्यार्थी परिषद् नेपाल, तथा “सेवा र विकासका लागि युवा” संस्थाको संयुक्त सहकार्यमा सम्पन्न भएको हो। जम्मा ६५६ थान विद्यार्थी झोला, विविध खेलकुद सामग्री (फुटबल, भलिबल, ब्याड्मिन्टन, कक, पम्प) वितरण गरिनु यस कार्यक्रमको मुख्य उपलब्धि हो।
कार्यक्रममा समाजसेवी दावा लामाको योगदानको उच्च कदर गर्दै काउलेदेवी ककनी ब्राइटर माविले दोसल्ला ओढाएर र सम्मानपत्र प्रदान गर्दै विशेष सम्मान गरेको थियो। लामाले धन्यवाद दिंदै भने, “सामाजिक सेवा भनेको पद र प्रचारको विषय होइन, यो त आफ्नो समुदायप्रति गरिने दायित्व र माया हो। हामीले यो अभियान निरन्तरता दिनेछौं।”
कार्यक्रममा ककनी–२ का वडा अध्यक्ष कृष्ण घिमिरे ‘मिलन’, विद्यालय व्यवस्थापन समिति अध्यक्षहरू, अभिभावक संघका प्रतिनिधिहरू, शिक्षक, अभिभावक र स्थानीय नागरिकहरूको उल्लेखनीय सहभागिता देखिएको थियो। सहभागीहरूले यस्तो खालको कार्यक्रमले विद्यार्थीहरूको आत्मविश्वास वृद्धि गर्न, पठन–पाठनमा मनोबल बढाउन र खेलकुदमा अभिरुचि जागृत गर्न ठुलो मद्दत गर्ने बताएका थिए।
स्थानीय बासिन्दाहरूले दावा लामाको यो पहललाई ‘समाज परिवर्तनको मौन तर प्रभावशाली कदम’ भन्दै प्रशंसा गरेका छन्। धेरैले यस्तो कार्यक्रमहरूलाई सरकारी संयन्त्रभन्दा पनि जन–सहभागितामूलक प्रयासका रूपमा उदाहरणीय मानेका छन्।
यस कार्यक्रमले ककनी क्षेत्रभित्र सामाजिक उत्तरदायित्व, स्थानीय नेतृत्व र सामूहिक सहकार्य कति प्रभावकारी हुन सक्छ भन्ने सन्देश दिएको छ। शिक्षा, महिला सशक्तीकरण र बालअधिकारको क्षेत्रमा यसले लामो समयसम्म सकारात्मक प्रभाव पार्ने विश्वास गरिएको छ।