सार्वजनिक यातायातमार्फत काठमाडौंबाट रसुवा जाँदै गरेका एक युवकको साथबाट ४३ हजार अमेरिकी डलर बरामद भएको छ ।

रसुवा – आज बिहान रसुवाको उत्तरगया गाउँपालिका–५, बेत्रावती बजारस्थित पासाङल्हामु सडकखण्डमा प्रहरीले बा.प्र.०१–००६ ख ९५१५ नम्बरको यात्रुवाहक बस रोकेर चेकजाँच गर्दा उक्त रकम फेला परेको हो ।

पक्राउ पर्नेमा धादिङको गंगाजमुना गाउँपालिका–५ निवासी ३७ वर्षीय सुशिल गुरुङ रहेका छन् । उनी टिमुरेतर्फ जाँदै गरेका थिए ।

विशेष सूचनाको आधारमा खटिएको प्रहरी टोलीले जाँचका क्रममा डलर बरामद गरेको जनाएको छ । पक्राउ परेका गुरुङलाई थप अनुसन्धानका लागि राजस्व अनुसन्धान विभाग पठाइएको प्रहरीले जनाएको छ ।