काठमाडौं – देशभर राजनीतिक अस्थिरता, भ्रष्टाचार, र कुशासनको विरुद्ध आवाज उठाउँदै आएका नागरिक अभियानहरू आज एकजुट भएका छन्। उनीहरूले “राजा आउ, देश बचाऊ” भन्ने नाराका साथ नेपालमा पुनः राजसंस्थाको स्थापनाका लागि विशाल प्रदर्शन गरेका छन्।
आज बिहानैदेखि काठमाडौंको त्रिभुवन अन्तर्राष्ट्रिय विमानस्थलमा लाखौँ जनसागर उर्लियो। राजा समर्थकहरूको अपार भीडले विमानस्थलको चोकदेखि तीनकुने, गौशाला, कोटेश्वरसम्मका सडक भरिएका थिए। स्वागत समारोहमा झण्डै २५ लाख मानिसको सहभागिता रहेको आयोजकहरूको दाबी छ। उनीहरू हातमा राष्ट्रिय झण्डा, राजसंस्थाका प्रतीक चिन्हहरू, ब्यानर तथा प्लेकार्ड बोकेर उत्साहपूर्वक नारा लगाइरहेका थिए।
**राजसंस्थाप्रति जनताको आशा**
राजनीतिक दलहरूको चरम असफलता, भ्रष्टाचार, महँगी, बेरोजगारी, र भष्ट्र प्रशासनका कारण आमजनता आजित भइसकेको अवस्था छ। कुनै समय गणतन्त्रका पक्षमा उभिएका थुप्रै नागरिक अभियन्ताहरू समेत अहिले राजसंस्थाको पुनःस्थापनाको पक्षमा खुलेर बोल्न थालेका छन्।
विभिन्न नागरिक अभियन्ता, बौद्धिक वर्ग, युवा समूह तथा सामाजिक अभियन्ताहरूले गणतन्त्रले नेपाली जनतालाई धोका दिएको र देशलाई नै अस्थिरताको भुमरीमा फसाएको आरोप लगाएका छन्। उनीहरूको भनाइ छ कि गणतन्त्रले वाचा गरेको समृद्धि, स्थायित्व, र पारदर्शिता कहिल्यै पूरा भएन। बरु, नेताहरूको स्वार्थ, अनियमितता, र कुशासनले देशलाई झन् कमजोर बनाएको छ।
**राजाको समर्थनमा एकजुट जनसागर**
राजसंस्थाका पक्षधरहरूले आजको प्रदर्शनलाई ऐतिहासिक भनेका छन्। उनीहरूका अनुसार, यो कुनै सामान्य प्रदर्शन मात्र नभएर नेपाली जनताको मुटुको धड्कन हो। एकजना प्रदर्शनकारीले भने, *”हामीले गणतन्त्रलाई १७ वर्षसम्म मौन रूपमा सह्यौं, तर अब हामी अरू हेरेर बस्न सक्दैनौं। राजा फेरी आएर देश सम्हाल्नुहुन्छ भन्ने विश्वास हामीलाई छ।”*
अर्का प्रदर्शनकारीले भने, *”लोकतन्त्रका नाममा नेताहरूले देशलाई लुटिरहेका छन्। राजसंस्था हुँदा देशमा स्थिरता थियो, नेताहरू शिष्ट हुन्थे, र जनतामा डर थियो। अहिले कोही कसैसँग डराउँदैन, भ्रष्टाचार खुलेआम छ।”*
**राजनीतिक दलहरू र वर्तमान सरकारको प्रतिक्रिया**
यस विशाल प्रदर्शनले सत्तारूढ दलहरूमा तनाव सिर्जना गरेको देखिन्छ। सत्तापक्षले यो आन्दोलनलाई *”राजनीतिक अस्थिरता निम्त्याउने षड्यन्त्र”* भनेको छ भने, विपक्षी दलहरूले यो घटनालाई सरकारप्रति असन्तोषको चरम संकेतका रूपमा लिएका छन्।
नेपाल सरकारका प्रवक्ताले भने, *”नेपालमा लोकतान्त्रिक व्यवस्था छ। यस किसिमका मागहरू लोकतान्त्रिक विधिबाट उठ्नुपर्छ।”* यस्तै, विभिन्न राजनीतिक विश्लेषकहरूले पनि राजसंस्थाको बहस फेरि एकपटक सतहमा आएको बताएका छन्।
**अब के होला?**
देशभर राजसंस्थाको पक्षमा समर्थन बढ्दै गइरहेको देखिन्छ। सामाजिक सञ्जालदेखि सडकसम्म राजा समर्थकहरूको उपस्थिति उल्लेखनीय रूपमा बढेको छ। आगामी दिनमा सरकार, राजनीतिक दलहरू, तथा आम नागरिकहरूले यस विषयमा कस्तो धारणा बनाउनेछन् भन्ने चासोको विषय बनेको छ।
नेपालमा पुनः राजसंस्थाको सम्भावनालाई कसरी हेरिन्छ? यो आन्दोलन सरकारलाई दबाब दिने किसिमले अघि बढ्ला कि केवल एक अस्थायी जोश मात्र साबित होला? यो प्रश्नको उत्तर समयसँगै खुल्दै जानेछ।
