नाक काटेर लगेपछि फरार : कन्नौजमा पतिद्वारा श्रीमतीमाथि बर्बर आक्रमण, अराजकता चरममा
—मन्दिरा भण्डारी—
भारतको उत्तर प्रदेशस्थित कन्नौजमा एउटा अकल्पनीय र क्रूर घटना सार्वजनिक भएको छ—जहाँ एक व्यक्तिले आफ्नी पत्नीको नाक दाँतले टोकेर काटिदिएका छन् र त्यसपछि फरार भएका छन्। यो घटना न केवल घरेलु हिंसाको चरम नमूना हो, यो राज्यभित्र फैलिँदै गएको कानुनी बेवास्ता र अराजक प्रवृत्तिको प्रतिबिम्ब पनि हो।
कालिनापुर्वा गाउँकी गुड्डी देवीको करिब १४ वर्षअघि काजी टोला इलाकाका पप्पुसँग विवाह भएको थियो। प्रारम्भदेखि नै पप्पु लागूपदार्थको लतमा फसेका थिए, र श्रीमतीमाथि बारम्बार दुर्व्यवहार गर्दै आएका थिए। दैनिकी हिंसा र झगडाबाट थाकेर गुड्डीले आफ्नो मामाघरमा बस्न थालेकी थिइन् र मजदुरी गरेर जीवन धानिरहेकी थिइन्।
तर, केही दिनअघि काम सकेर घर फर्किंदै गरेकी गुड्डीलाई पप्पुले बाटोमै रोके। साथमा जान अडान राखे, गुड्डीले अस्वीकार गरिन्। यही अस्वीकारको मूल्य उनीसँग नाक गुमाएर चुकाउनुपर्यो। पप्पुले उनलाई खेत नजिकको झाडीमा घिसार्दै लगे, घाँटी थिचेर पिटे र दाँतले नाक टोकेर काटिदिए। क्रूरताको पराकाष्ठा त त्यहाँ पुग्यो जब उनले काटिएको नाक पनि साथमै लगे।
गुड्डी गम्भीर घाइते भएकी छिन्। जिल्ला अस्पतालबाट उनलाई कानपुर रेफर गरिएको छ। यथार्थमा, यो पहिलो पटक पप्पुले गुड्डीमाथि हमला गरेका होइनन्। करिब तीन वर्षअघि पनि उनले बस स्टप नजिकै गुड्डीमाथि बारम्बार चक्कु प्रहार गरेका थिए। त्यतिबेला जेल परेका उनी पछि जमानतमा छुटे र अब फेरि नाक काट्ने जस्तो बर्बर अपराध गरेका छन्।
यस घटनाले उत्तर प्रदेशमा घरेलु हिंसामाथि नियन्त्रण, पुनरावृत्त अपराधमा राज्य संयन्त्रको कमजोरी, र महिला सुरक्षाको गम्भीर संकटलाई उजागर गरेको छ। दोषी खुलेआम हिंसात्मक गतिविधि गर्दै हिँडिरहेका छन् भने पीडित महिलाहरूको अवस्था अस्पतालको बेडमा अझै पनि न्यायको प्रतीक्षामा छ।
प्रहरीले गुड्डीको उजुरीका आधारमा पप्पुविरुद्ध मुद्दा दर्ता गरी खोजी थालेको जनाएको छ, तर अघिल्लो आक्रमणपछिको जमानत र पुन: आक्रमणको परिप्रेक्ष्यमा यो प्रकरणले प्रश्न उठाएको छ—के वास्तवमै यस्तो अराजकता अन्त्य हुन्छ? वा नाक गुमाएपछि पनि महिलाहरू न्यायको आसमै रोइरहने हुन्?
