काठमाडौँ — इजरायलले दक्षिण गाजाको रफाह क्षेत्रमा रहेको एक भूमिगत सुरुङमा फसेका ४० हमास लडाकुहरूलाई मारिएको दाबी गरेको छ। इजरायली सेनाका अनुसार रफाह क्षेत्रमा हमासका किल्ला र सुरुङहरू खत्तम पार्ने अभियान तीव्र रूपमा जारी छ।
सेनाले गत हप्तामात्रै सुरुङ भित्र ४० भन्दा बढी सशस्त्र हमास लडाकु मारिएको जनाएको छ। इजरायलले यसअघि पनि रफाहमा धेरै लडाकुहरू मारिएको र केही पक्राउ परेको दाबी गर्दै आएको छ। तर हमासले इजरायली दाबीहरूप्रति कुनै टिप्पणी गरेको छैन।
इजरायली मिडियाका रिपोर्टअनुसार करिब ९ महिनादेखि—मार्चदेखि—झन्डै २०० हमास लडाकुहरू रफाहको भूमिगत सुरुङ प्रणालीमा फसेको बताइन्छ। हमासले बारम्बार सुरक्षित बाहिर निस्कने मार्ग दिन इजरायलसँग माग गर्दै आएको भए पनि, इजरायलले “आतंककारीहरूलाई निस्कन दिने कुनै योजना नरहेको” स्पष्ट गर्दै आएको छ।
गत महिना बाहिरिएको रिपोर्टले रफाहमा रहेका लडाकुहरू ७–८ महिनादेखि सम्पर्कविहीन रहेको उल्लेख गरेको थियो। त्यसपछि नोभेम्बर ६ मा, हमासले आफ्ना लडाकुहरूलाई सुरक्षित रूपमा बाहिरिन दिने प्रस्ताव इजरायलसमक्ष राखेको थियो। तर इजरायलले उक्त प्रस्ताव अस्वीकार गर्दै, “आतंकवादीसँग सम्झौता नहुने” बताएको हो।
युद्धविराम सम्झौतामा राखिएको प्रस्तावअनुसार, लडाकुहरूको रिहाइको बदलामा हमासले आफ्ना हतियार आत्मसमर्पण गर्ने र गाजामा रहेका सुरुङहरूको पूर्ण विवरण उपलब्ध गराउने थियो, जसले इजरायललाई सुरुङ प्रणाली नष्ट गर्न मद्दत हुने बताइएको थियो। उक्त प्रस्तावबारे अमेरिका र कतारलाई पनि जानकारी गराइएको थियो।
हालसम्म हमासले कुनै प्रतिक्रिया दिएको छैन, र रफाह क्षेत्रमा दोहोरो आक्रमण तथा सुरुङ विनाश अभियान जारी छ।
