सांसद ज्ञानेन्द्र शाहीद्वारा काठमाडौँ महानगरपालिकालाई रु १ लाख जरिवाना बुझाइयो
सांसद ज्ञानेन्द्र शाहीद्वारा काठमाडौँ महानगरपालिकालाई रु १ लाख जरिवाना बुझाइयो
काठमाडौँ, फागुन २६ – प्रतिनिधिसभाका सांसद तथा राप्रपा नेता ज्ञानेन्द्र शाहीले काठमाडौँ महानगरपालिकालाई रु १ लाख जरिवाना बुझाएको छ। उनले सामाजिक सञ्जालमार्फत सार्वजनिक गर्दै यसलाई सुशासन र विधिको पालना गर्ने प्रतिबद्धताको रूपमा चित्रण गरेका छन्।
फागुन २५ गते राजधानीमा आयोजित एक कार्यक्रममा पूर्वराजा ज्ञानेन्द्र शाहलाई स्वागत गर्न ठुलो संख्यामा जनता उपस्थित भएका थिए। सो क्रममा, समर्थकहरूको भिडले महानगरको सार्वजनिक सम्पत्तिमा क्षति पुर्याएको हुनसक्ने भन्दै काठमाडौँ महानगरपालिकाले जरिवाना तोकेको थियो।
सांसद शाहीले आफ्नो फेसबुक स्टाटसमा लेखेका छन् – **”हामी राप्रपा सुशासन मान्छौं र विधिको शासन मान्छौं। राजाको स्वागतमा आएका लाखौं आमाबुवा, दाजुभाइ, बहिनीहरूले हिँड्दा बाटोमा केही कुल्चिए होलान्। महानगरपालिकाको निर्णयलाई हामी स्वीकार्दछौं। रु १ लाख रुपैयाँ हामीले काठमाडौँ महानगरपालिकाको खातामा दाखिला गरेका छौं।”**
उनको यो कदमलाई समर्थकहरूले जिम्मेवारीपूर्ण निर्णयका रूपमा लिएका छन् भने केहीले यसलाई राजनीतिक सन्देश दिन गरिएको कदमको रूपमा हेरेका छन्।
यसैबीच, पूर्वराजा ज्ञानेन्द्र शाहले सोही कार्यक्रममा सम्बोधन गर्दै देशमा स्थायित्व, राष्ट्रिय एकता र समृद्धिका लागि राजसंस्थाको भूमिका पुनर्स्थापना हुनुपर्ने धारणा राखेका थिए।
सांसद शाहीको यो निर्णयले वर्तमान राजनीतिमा राजसंस्था र गणतन्त्रको बहसलाई थप चर्काएको देखिन्छ। अब यसको राजनीतिक तथा सामाजिक प्रभाव कस्तो देखिन्छ भन्ने कुरा समयक्रममै स्पष्ट हुनेछ।
