भारतको कुशीनगरमा बन्धक बनाइएका ४५३ नेपालीको उद्धार:

बुटवल — भारतको उत्तर प्रदेशस्थित कुशीनगरमा बन्धक बनाएर राखिएका ४ सय ५३ नेपाली नागरिकको सफल उद्धार गरिएको छ। भारतीय प्रहरीको समन्वयमा लुम्बिनी प्रदेश प्रहरी र रूपन्देही प्रहरीको संयुक्त टोलीले शुक्रबार उद्धार गरी शनिबार उनीहरूलाई नेपाल ल्याएको हो।

प्रहरीका अनुसार आकर्षक जागिर र उच्च आम्दानीको झुटो प्रलोभन देखाउँदै नेपाली युवायुवतीलाई भारत पुर्‍याएर बन्धक बनाउने संगठित गिरोह सक्रिय रहेको पुष्टि भएको छ। प्रारम्भिक अनुसन्धानले देखाएअनुसार उक्त गिरोहले सुनौली नाका हुँदै नेपालीहरूलाई कुशीनगर पुर्‍याएर प्रति व्यक्ति ७ हजारदेखि १ लाख भारतीय रुपैयाँसम्म असुल गर्ने गरेको थियो।

यो गिरोहले नेटवर्किङ व्यवसायको नाममा सदस्यता विस्तार गर्ने ढाँचामा ठगी गर्दै आएको खुलेको छ। सदस्य बन्न नसक्नेहरूलाई परिवारमार्फत धम्की दिई जबर्जस्ती रकम असुल्ने प्रयास समेत गरिएको पाइएको प्रहरीले जनाएको छ।

रूपन्देही प्रहरी प्रमुख जनकबहादुर शाहीका अनुसार कुशीनगर क्षेत्रमा लुम्बिनी, कोशी र सुदूरपश्चिम प्रदेशका गरी कम्तीमा १ हजार नेपाली युवायुवतीलाई बन्धक बनाइएको आशंका छ। “सूचनाका आधारमा निगरानी बढाउँदै जाँदा बन्धक राखिएको स्थान पत्ता लाग्यो, त्यसपछि भारतीय प्रहरीको सहयोगमा उद्धार सम्भव भयो,” उनले बताए।

उद्धार अभियानलाई उत्तर प्रदेशका मुख्यमन्त्री योगी आदित्यनाथ र भारतीय सुरक्षा निकायबाट विशेष सहयोग प्राप्त भएको प्रहरीले जनाएको छ।

पीडितका आफन्तहरूले बन्धक बनाइ फिरौती मागिएको भन्दै इलाका प्रहरी कार्यालय बुटवलमा उजुरी दिएपछि अनुसन्धान सुरु भएको थियो। प्रहरी नायब उपरीक्षक निशान्त श्रीवास्तवका अनुसार चार दिनको निरन्तर प्रयासपछि ठूलो संख्यामा नेपाली नागरिकलाई सुरक्षित रूपमा उद्धार गर्न सफल भएको हो।

घटनाले वैदेशिक रोजगारीको नाममा हुने मानव तस्करीको गम्भीर रूप फेरि एकपटक उजागर गरेको छ। यस प्रकरणमा संलग्न गिरोहको खोजी तथा थप अनुसन्धान जारी रहेको प्रहरीले जनाएको छ।