नुवाकोट तेक्वान्दो संघमा नेतृत्व हस्तान्तरण, पाँचौँ अधिवेशनबाट शरण घलेको अध्यक्षतामा नयाँ कार्यसमिति
नुवाकोट तेक्वान्दो संघको पाँचौँ अधिवेशनले संघको नेतृत्व नयाँ टिमलाई सुम्पिएको छ। लामो समयदेखि संगठन सुदृढीकरण र खेलाडी उत्पादनमा सक्रिय रहँदै आएको संघले यस अधिवेशनमार्फत आगामी कार्यदिशा स्पष्ट गर्ने संकेत दिएको छ।
अधिवेशनका प्रमुख अतिथि राष्ट्रिय खेलकुद परिषद्का सदस्य तथा नेपाल तेक्वान्दो संघका केन्द्रीय सदस्य कुमार लामा घिसिङले जिल्लास्तरबाटै सक्षम खेलाडी उत्पादन गर्नुपर्ने आवश्यकता औँल्याउँदै संस्थागत अनुशासन र निरन्तरतामा जोड दिए। नेपाल तेक्वान्दो संघ बागमती प्रदेश सदस्य कवि मालीले प्रदेशस्तरीय सहकार्य बिना जिल्लाको खेल विकास सम्भव नहुने उल्लेख गरे।
कार्यक्रममा जिल्ला खेलकुद विकास समिति नुवाकोटका अध्यक्ष विजय गुरुङले नुवाकोटको खेल सम्भावना राष्ट्रियस्तरसम्म पुर्याउन यस्ता संघहरूको भूमिका निर्णायक हुने बताए। साथै काठमाडौं जिल्ला तेक्वान्दो संघका सह–सचिव दुर्गा मान तामाङसहितका अतिथिहरूले संघीय संरचनामा जिल्ला संघहरूको समन्वय अपरिहार्य रहेको धारणा राखे।
अधिवेशनले शरण घलेको अध्यक्षतामा नयाँ कार्यसमिति सर्वसम्मत रूपमा चयन गरेको छ। उपाध्यक्षमा रामचन्द्र तामाङ, कोषाध्यक्षमा सुमन श्रेष्ठ निर्वाचित भएका छन्। सदस्यहरूमा गणेश राई, राजु लामा, सुजन लामा मोक्तान, कविन्द्र कारञ्जित र संगिता खाति पाण्डे चयन भएका छन्।
नवनिर्वाचित अध्यक्ष घलेले प्रशिक्षक, खेलाडी र अभिभावकको विश्वास नै संघको वास्तविक शक्ति भएको उल्लेख गर्दै “अब संगठन चलाउने मात्र होइन, नुवाकोटलाई तेक्वान्दोको बलियो केन्द्र बनाउने जिम्मेवारी हाम्रो काँधमा आएको छ,” भने।
अधिवेशनले नयाँ नेतृत्व चयनसँगै नुवाकोट तेक्वान्दो संघलाई औपचारिक कार्यक्रममै सीमित नराखी परिणाममुखी खेल राजनीतितर्फ लैजाने अपेक्षा पनि गरेको छ।
-
अध्यक्ष: शरण घले
-
उपाध्यक्ष: रामचन्द्र तामाङ
-
कोषाध्यक्ष: सुमन श्रेष्ठ
-
सदस्य: गणेश राई
-
सदस्य: राजु लामा
-
सदस्य: सुजन लामा मोक्तान
-
सदस्य: कविन्द्र कारञ्जित
-
सदस्य: संगिता खाति पाण्डे
