डा. पिया रत्न महर्जन तथा Master Huei Guang, बोधिसत्व विहारको निरन्तर मानवीय अभियान : नुवाकोटका ३०० बाढी प्रभावित परिवारलाई राहत
नुवाकोट- प्राकृतिक विपद्का कारण जनजीवन प्रभावित भइरहेका बेला पीडित नागरिकको साथमा उभिँदै निरन्तर मानवीय सेवामा सक्रिय रहनुभएका डा. पिया रत्न महर्जनको पहल तथा Master Huei Guang र Bodhisattva Vihara Gumbaको सहयोगमा नुवाकोट जिल्लाका ३०० बाढी प्रभावित परिवारलाई राहत सामग्री वितरण गरिएको छ।
नेपालमा प्राकृतिक विपद् आउँदा प्रभावित समुदायसम्म तत्काल पुगेर राहत तथा मानवीय सहयोग उपलब्ध गराउने अभियानमा डा. पिया रत्न महर्जन पछिल्ला वर्षहरूदेखि निरन्तर सक्रिय रहँदै आउनुभएको छ। विनाशकारी भूकम्पदेखि काभ्रेको बाढी तथा अन्य विभिन्न प्राकृतिक विपद्का समयमा समेत उहाँले राहत, उद्धार तथा मानवीय सहयोगका अभियानमा महत्वपूर्ण भूमिका निर्वाह गर्दै आउनुभएको छ।
उहाँको मानवीय अभियान कुनै एक स्थान वा एकपटकको राहत वितरणमा सीमित छैन। नेपालका विभिन्न जिल्लामा विपद् तथा संकटमा परेका नागरिकको आवश्यकता पहिचान गरी सहयोग पुर्याउने निरन्तर प्रतिबद्धता उहाँको सेवाको विशेष पहिचान बनेको छ।
यस अभियानमा Master Huei Guang तथा Bodhisattva Vihara Gumbaले खाद्यान्न, त्रिपाल, म्याट, लत्ताकपडा, औषधि तथा अन्य अत्यावश्यक सामग्री उपलब्ध गराएर महत्वपूर्ण मानवीय सहयोग गर्नुभएको छ। प्राप्त सामग्रीलाई वास्तविक आवश्यकता पहिचान गरी बढी प्रभावित तथा राहतको पहुँच पुग्न कठिन भएका परिवारसम्म पुर्याउने कार्य भइरहेको छ।
राहत वितरणमा विशेषगरी घरबारविहीन तथा मृतक परिवारलाई पहिलो प्राथमिकता, आंशिक क्षति भएका परिवारलाई दोस्रो प्राथमिकता तथा अन्य कारणबाट प्रभावित व्यक्तिलाई तेस्रो प्राथमिकतामा राखी आवश्यकता अनुसार सहयोग उपलब्ध गराउने प्रयास गरिएको छ।
विपद्को घडीमा वात्सल्य सदन, 100s ग्रुप, अभियन्ता, स्वयंसेवक तथा स्थानीय सहयोगीहरू प्रभावित क्षेत्रमा प्रत्यक्ष रूपमा खटिएका छन्। राहत सामग्रीको आवश्यकता भएका तर पर्याप्त सहयोग पुग्न नसकेका बस्ती तथा क्षेत्र पहिचान गर्दै स्थानीयसँग समन्वय र सहकार्य गरी पीडित परिवारको घरदैलोसम्म राहत पुर्याउने काम भइरहेको छ।
सहज पहुँच भएका स्थानमा मात्र नभई राहत पुग्न कठिन तथा बढी प्रभावित क्षेत्रलाई प्राथमिकतामा राख्दै टोली आफैं प्रभावित बस्तीमा पुगेर राहत व्यवस्थापन तथा वितरण गरिरहेको छ। यस क्रममा राहत वितरणसँगै प्रभावित परिवारको अवस्था बुझ्ने, तत्काल आवश्यकताहरू पहिचान गर्ने तथा आवश्यकताअनुसार थप सहयोगका लागि समन्वय गर्ने कार्यसमेत भइरहेको छ।
डा. पिया रत्न महर्जनले विपद्लाई केवल राहत वितरणको विषयका रूपमा नभई मानवीय संवेदना, सामाजिक उत्तरदायित्व र समुदायप्रतिको कर्तव्यका रूपमा लिनुभएको देखिन्छ। पीडित परिवारको दुःखमा प्रत्यक्ष सहभागी हुँदै उनीहरूको आवश्यकता सम्बोधन गर्न पहल गर्नु उहाँको मानवीय अभियानको महत्वपूर्ण पक्ष हो।
विपद्को समयमा कहाँ आवश्यकता बढी छ, कसलाई पहिलो प्राथमिकता दिने, कुन सामग्री तत्काल आवश्यक छ र कसरी सुरक्षित रूपमा प्रभावित परिवारसम्म पुर्याउने भन्ने विषय आफैंमा ठूलो चुनौती हो। यही चुनौतीका बीच अभियन्ता, स्वयंसेवक तथा ककनी मिडिया टोली प्रभावित क्षेत्रमै पुगेर राहत तथा उद्धार अभियानलाई निरन्तरता दिइरहेको छ।
विपद्को समयमा भाषणभन्दा सेवा, आश्वासनभन्दा उपस्थिति र प्रचारभन्दा पीडितको घरदैलोमा पुगेर गरिने सहयोग महत्वपूर्ण हुन्छ। यही भावनाका साथ आफ्नो समय, श्रम र स्रोत खर्चेर पीडित नागरिकको साथमा उभिने यो मानवीय अभियान अघि बढिरहेको छ।
नुवाकोटका ३०० बाढी प्रभावित परिवारसम्म राहत पुर्याइएको यो अभियानले विपद्मा परेका नागरिकलाई ‘तपाईंहरू एक्लै हुनुहुन्न’ भन्ने भरोसा दिलाएको छ। कठिन समयमा पीडितको दुःखलाई आफ्नै दुःख सम्झेर घरदैलोसम्म पुग्ने यो प्रयासले मानवता, सामाजिक उत्तरदायित्व र सहकार्यको भावना अझ बलियो बनाएको छ।
नेपालका विभिन्न विपद्का समयमा निरन्तर सक्रिय रहँदै आउनुभएका डा. पिया रत्न महर्जनप्रति हार्दिक सम्मान तथा आभार व्यक्त गर्दछौँ। साथै, यस मानवीय अभियानमा महत्वपूर्ण सहयोग पुर्याउनुहुने Master Huei Guang तथा Bodhisattva Vihara Gumbaप्रति पनि हार्दिक धन्यवाद व्यक्त गर्दछौँ।
