सभामुखको आग्रह अस्वीकार : प्रधानमन्त्री बालेनले संसदमा प्रश्नोत्तरका लागि समय दिएनन्
काठमाडौं, जेठ ६ — प्रतिनिधिसभामा प्रधानमन्त्रीसँगको नियमित प्रश्नोत्तर कार्यक्रम अनिश्चित बनेको छ। सभामुख देवप्रसाद अर्याल ले आग्रह गर्दा पनि प्रधानमन्त्री बालेन शाह ले संसदमा उपस्थित भएर प्रश्नोत्तरका लागि समय दिन अस्वीकार गरेका छन्।
प्रतिनिधिसभा नियमावलीअनुसार प्रत्येक महिनाको पहिलो साता एक दिन प्रधानमन्त्रीसँग एक घन्टा प्रश्नोत्तर कार्यक्रम सञ्चालन गर्नुपर्ने व्यवस्था छ। सोही व्यवस्थाअनुसार समय निर्धारण गर्ने अधिकार सभामुखलाई भए पनि प्रधानमन्त्री शाहले आगामी साताका लागि समय दिन नमानेको एक सांसदले जानकारी दिएका छन्।
विपक्षी दलहरूले नियमावली कार्यान्वयनको माग गर्दै संसद बैठक अवरुद्ध गरेपछि सभामुख अर्यालले बैठक १५ मिनेटका लागि स्थगित गरी प्रधानमन्त्रीसँग छलफल गर्न प्रधानमन्त्री कार्यालय पुगेका थिए। भेटका क्रममा सभामुखले नियमावलीको बाध्यात्मक व्यवस्था स्मरण गराउँदै संसदमा उपस्थित हुन आग्रह गरेका थिए।
सभामुखले अर्को साताको कुनै दिन उपस्थित भएर सांसदका प्रश्नको जवाफ दिन प्रस्ताव राखे पनि प्रधानमन्त्री शाहले ‘उपयुक्त समयमा आउने’ भन्दै तत्काल समय दिन इन्कार गरेको जनाइएको छ।
प्रधानमन्त्रीसँगको उक्त छलफलबारे सभामुखले कार्य व्यवस्था परामर्श समितिमा सहभागी सांसदहरूलाई जानकारी गराएका थिए। समितिमा विभिन्न दलका प्रमुख सचेतक तथा सचेतकहरू रहने व्यवस्था छ भने कानुनमन्त्री पदेन सदस्यका रूपमा सहभागी हुन्छन्।
संसदीय परम्पराअनुसार प्रधानमन्त्रीले नीति तथा कार्यक्रममाथि जवाफ दिनुपर्ने भए पनि शाह यसअघि पनि उपस्थित नभएको उल्लेख गरिएको छ। यस्तै, नियमावलीले प्रश्नोत्तर कार्यक्रम स्थगित गर्न सकिने भए पनि पूर्ण रूपमा टार्न नपाइने स्पष्ट व्यवस्था गरेको छ।
प्रधानमन्त्री संसदमा उपस्थित हुन नमानेपछि विपक्षी दलहरूले विरोध जारी राख्ने चेतावनी दिएका छन्। नेकपाका प्रमुख सचेतक युवराज दुलाल ले आजको बैठकमा पनि विरोध कायम रहने र त्यसपछि थप रणनीति तय गरिने बताएका छन्।
